В пятницу 22 октября 2026 года на заседании Священного Синода были утверждены к общецерковному богослужебному употреблению тексты молитвословий святым, которые пострадали за Церковь Христову вместе со священномучеником Вениамином, митрополитом Петроградским! patriarchia.ru/article/123501
ПРЕПОДОБНОМУЧЕНИКА СЕРГИЯ (ШЕИНА)
И МУЧЕНИКОВ ЮРИЯ НОВИЦКАГО И ИОАННА КОВШАРОВА
Тропарь, глас 1:
Божию Закону добре последовавше,/ ближним усердно послужили есте/ и святителю Вениамину сподвижницы вернии явившеся,/ узы, суд неправедный и смерть вкупе с ним претерпели есте,/ отче богомудре Сергие,/ Юрие славный и Иоанне честный,/ молите Всеблагаго Бога// Церкви и Отечеству нашему даровати велию милость.
Кондак, глас 6:
Яко древнии мученицы, на Единаго Праведнаго Судию взирающе,/ пред беззаконными правду Божию глаголали есте,/ и веры православныя благомощие показавше,/ страданьми за Христа чада церковная укрепили есте,/ новомученицы Петроградстии Сергие, Юрие и Иоанне,// теплии предстателие о почитающих вас.
Молитва
О святии славнии новомученицы Христовы Сергие, Юрие и Иоанне, града Петрова похвало и Церкве Русския радование!
Вы во дни гонений судилище беззаконное мужественне претерпели есте и кончины мученическия со святым архипастырем вашим Вениамином сподобившеся, во Царствии Небеснем со Ангелы и всеми святыми ныне ликовствуете.
Сего ради к вам яко правды Божия ревнителем и правоведцем богомудрым усердно взываем: молите Господа, да умножит милости Своя ко Отечеству нашему и утвердит в нем непоколебиму святую Свою Церковь; правителем нашим и всем иже во власти суть да подаст мудрость и силу, дух совета и разума ко благу народа нашего; судиям страх Божий, суд праведный и безкорыстие; обидимым заступление; оклеветаемым оправдание и всем людем вся ко временней и вечней жизни полезная.
Наипаче же укрепите нас в вере православней и любви нелицемерней, наставите нас всегда творити волю Божию и хранити заповеди Его, да мирное зде поживем житие и сподобимся добрый ответ дати на Страшнем Судищи Христове и купно с вами прославляти Отца и Сына и Святаго Духа во веки веков. Аминь.